過來人 返回上一頁


『賭』正顯我真本領, 聽那刺激歡呼聲,曾幾何時;聽到這首歌的歌詞,確曾激發我有一種衝動、妄想、貪婪的慾念。但實際背後,卻是付出不少;包括:時間、金錢、感情、家人、朋友、更甚還當賠上自己的生命。

 

我細個時在舊型屋村長大,終日在街上流連,所以好早巳接觸賭博呢樣野;麻雀、字花(巳湮沒)、啤牌、狗、馬及街邊的魚、蝦、蟹、賭檔,五花八門。但因當時年紀少,並沒有太沉迷在賭博上,只係偶然會玩下。

 

後讀完書,我就入職公務員行列(警察),於80年代,當時警隊各部門之賭風十分風盛,賭已成為同事們作為社交、消遣娛樂之首選,差館內,每日能接觸到麻雀、啤牌、十五湖等等…...。

 

不經不覺,『賭』在我身邊已經纏繞超過二十五年,倒頭來,我所得到的衹係一筆債項,由我20歲那年,第一次向銀行借錢,後期至財務公司、家人、親戚、朋友,沒完沒止,借錢、還錢好像已成為我生命中的一部份。

 

太太跟我巳有二十多年,佢亦都知道我有賭錢的習慣及負債的問題,最初,亦曾出錢幫我清還債項,後期;太太無再幫我,佢要我自己承擔番賭錢帶來既惡果,太太也曾用過好多方法幫我戒賭;包括:經濟封鎖、時間操控,而每次都有一個希望比佢,但最終係失望而回,我在太太之家人、朋友面前是一名好好先生,沒有人知道我原來是一名『爛賭鬼』,而太太亦從不跟人家說起,所以我知佢受不少無形既壓力;家庭、經濟負擔、夫婦感情、子女成長、婚姻等一連串問題。

 

從學識賭錢至今,我輸丟約二百幾萬,亦曾無數次要求太太原諒,〔比多最後一次機會我〕。最近我又出事了,我巳經無過澳門賭錢,賽馬、足球我已無賭,但唔知點解,我愛上到麻雀館打麻雀,而且打得好大,每次都可以輸丟一、二萬元,曾經亦試過一個月輸十幾萬在麻雀上,始終;紙係包唔住火的,我又賭錢及加重負債,好快就比我太太知道,今次佢無鬧我,一反常態,好平靜咁同我講:『子女養育問題我會處理,你搬出去住會好些,以後再唔會有人管你,你鍾意做乜都得,最後講多一句,如果有病,就搵醫生睇下』,之後就無再跟我說話了。

 

突然間,我好像感覺到會失去身邊所有東西;家庭、太太、子女,以前從未好認真咁諗呢個問題,只係每次都敷衍了事,但今次我確實好認真去諗,我係為了什麼成日去賭錢,我係咪真係有病需要睇醫生或尋求有關既人仕幫助呢?

 

之後,我查得一間叫『明愛展晴中心』之電話,呢間中心負責戒賭輔導服務,於是我致電求助,及一名女輔導員在電話內與我對話,我就將自己賭錢既情況、欠債及家庭問題簡略咁向呢名女輔導員講,及後輔導員約我作會面之安排。

 

在第一次的會面,我再重申向輔導員講述我的賭錢生涯,在傾談間,輔導員跟我講了一段說話,我真的以前從未想過。佢話:『從你第一次賭錢,你就係輸家,賭錢係唔會贏到錢既』。我心諗,佢講得無錯,由我學識賭錢到現在,我真的沒有贏過錢,有機會贏番,第二日又係輸番出去,今時今日贏輸對我來講巳經麻木了,我只不過係追求緊在賭錢上那種刺激的感覺。

 

接下來,輔導員再安排我與太太參加是次戒賭輔導服務,佢話,除了我需要接受輔導,我太太亦更加需要人幫助,所以佢叫我回去誠意地邀請太太一齊出席。在冷戰期間,我跟太太講,我去了一間戒賭輔導服務中心,職員希望妳能夠同我一齊參予,太太問我邊個叫你去呢間中心既,我答佢話覺得自己真係有病(病態賭徒),所以要搵人求助,太太最後亦都應承參予輔導服務。

 

差不多一年之輔導會面,我巳經無再到麻雀館打麻雀了,而我太太從第一次見輔導員,佢既表現由原有的徬徨、無助、變成今日之開懷、喜悅。記得在輔導中期,因有事與太太一同到訪澳門,當時與朋友一齊進入一間賭場玩樂,太太比了港幣3000元我,叫我玩,贏輸都算,當時我拿了錢並沒有下注,我在賭場度四圍行,望下身邊及賭檯四周的人,而每個人的神態都唔同,贏了跟輸了的臉孔成了一個好大的對比,正所謂:『旁觀者清,當局者迷』,我第一次以局外人的身份去睇賭錢既人,回想自己的以往,跟他們又有乜分別呢?當晚我將全部錢交還給我太太,佢好奇地問既我:『做乜呀,贏了錢呀?』我答佢話:『我一舖都無賭過,我突然好似對賭呢樣野失去興趣』。太太就拖住我隻手話:『唔賭仲好啦』。

 

而家我每個月都因應酬而與友人打麻雀,每個月一至二次(輸贏數目不大),而每次都有向太太申報及允許,太太以前亦曾經講過:『在能力範圍負擔得起既叫“遊戲”,而超出能力範圍外者就叫“賭博”』。所以我每次打麻雀亦不需要隱瞞,可以明正言順向太太講,不像以前鬼鬼崇崇去賭錢,但呢樣野,當然係適可而止,給自己節制及適當之安排,在『明愛展晴中心』輔導員協助下,最大得益係我與太太之間既感情關係,過往因隱瞞賭錢、負債問題而成日講大話,而家已沒有不能跟太太說的話了。

 

有關賭博呢樣野,我以過來人身份而領會到;從少開始就不應給子女接觸,所以我絕對唔會在屋企打麻雀及給子女接觸有關賭博的資訊,負債問題,就係唔好申請銀行信用咭或透支戶口,以減低負債之風險,(個人理財)方面,我仍在學習階段,總之;就係盡早清還債務。

 

現在我發覺,除了賭錢,仲有好多好有意義既事情等我去做,大家也不妨還顧身邊的人,等你去關心及有很多事情等你去關注,時間走得好快,過去的已成過去,我相信人係為開心而活?,我再也不會為昨日的賭而令自己增添煩惱了。

 

在此,衷心多謝『明愛展晴中心』的陳姑娘,佢唔單止幫我解決戒賭問題,帶我返回岸上,不再在賭海裏浮沉,還幫我挽回面臨破碎的家庭,但最後要多謝的,當然係一直在我身邊支持我既太太,你放心,我一定唔會令妳再有『失望』的感覺。

 

(過來人)
二零零五年四月

隱私政策
Copyright © 2016 Caritas Hong Kong. All rights reserved.
資助
建議使用Mozilla Firefox 或 Google Chrome或IE11以上瀏覽器及1440x900解像度屏幕觀看本網站,以獲得最佳效果。
瀏覽人數 636,989